Prishtinë 20 Prill 2012 – Agjencia kundër korrupsionit i demanton fuqishëm raportimet e disa mediave kosovare se gjoja Hasan Preteni drejtori i saj është duke u hetuar penalisht nga misioni i Bashkimit Evropian në Kosovë EULEX.
Gazeta “Lajm” në numrin e sotëm ( 20 prill 2012), përmes kryeartikullit “EULEX-i heton Pretenin” me tendencë skandaloze ka dezinformuar publikun dhe ka shtrembëruar skajshmërisht faktet dhe të vërtetën. E vërteta e këtij rasti është se z Preteni nuk është objekt i ndonjë hetimi penal, por thjeshtë ka qenë pjesë e një intervistimi nga zyrtarët e Policisë së Kosovës si reflektim i një ankese të bërë nga ana e organizatës Çohu, ku pjesë e intervistimit po ashtu kanë qenë edhe vetë aktivistët e organizatës Çohu
Për saktësi të rastit komenti I EULEX-it adresuar gazetës në fjalë ka qenë: -“EULEX mund të konfirmojë se anëtarët e OJQ-së ÇOHU dhe Hasan Preteni janë intervistuar. Tema e intervistës ishte e lidhur me një ankesë të paraqitur nga OJQ-ja kundër kreut të Agjencisë Anti-Korrupsion”. Ky ka qenë komenti I EULEX-it dhe po ashtu kjo është e vërteta.
Për tej kësaj gazeta në fjalë shkon edhe më larg duke e ndërlidhur mungesën e prezencës së z Preteni në Komisionin për Buxhet dhe Financa si rrjedhojë e “hetimeve” të pretenduara nga gazeta. Në fakt është e vërtetë se ai ka qenë në polici në stacionin policorë në veri në “Kodrën e Trimave” në takim me komandantin e stacionit policorë kapiten Bashkim Spahiun. Mirëpo jo si i dyshuar por krejtësisht në rolin e paditësit. Është e drejtë e çdo kujt të ushtrojë kallëzime penale, por rasti në fjalë është shpifje e drejtuar kundër një institucioni dhe drejtorit të saj me qëllim që organizata Çohu të sigurojë donacion.
Agjencia kundër korrupsionit garanton qytetarët e Kosovës, se kurrë në asnjë rast në AKK, nuk ka pasur shkelje ligjore apo dëmtim buxheti, nuk do të ketë as në të ardhmen. Shpifjet e individëve dhe organizatave të ndryshme, bëhen me qëllime të interesit privat ose klanor, por të gjitha këto janë të kota. Misioni i AKK-së është i pa lëkundur edhe përkundër kërcënimeve dhe shantazheve që z Preteni personalisht ka marr nga dy aktivist të organizatës në fjalë.
Agjencia do ti përdorë të gjitha mjetet ligjore në kërkim të të vërtetës në raport me gazetën Lajm.
